रामाळा तलावाच्या स्वच्छतेसाठी निधी उपलब्ध करणार
पर्यावरण मंत्री आदित्य ठाकरे यांचे आश्वासन
उपोषण मागे घेण्याचे केले आवाहन
प्रदमुषनमुक्त व सुशोभिकरण या दोन भागात कामाचे विभाजन
सात दिवसात अंदाजपत्रक सादर करण्याचे निर्देश
चंद्रपूर, दि. 1 मार्च : रामाळा तलावाच्या शुद्धिकरणाचे काम प्रदुषनमुक्त करणे व सुशोभीकरण करणे या दोन भागात विभागून त्याच्या खर्चाचे अंदाजपत्रक येत्या आठ दिवसात सादर करण्याचे निर्देश राज्याचे पर्यटन व पर्यावरण मंत्री आदित्य ठाकरे यांनी चंद्रपूर जिल्हा प्रशासनाला दिले असून प्रस्ताव प्राप्त झाल्यावर लगेचच निधी उपलब्ध करून देण्याचे आश्वासन त्यांनी दिले. सोबतच या तलावाच्या शुद्धिकरणासाठी पर्यावरण संघटनेचे बंडू धोत्रे यांनी सुरू केलेले उपोषण मागे घेण्याचेही त्यांनी आवाहन केले आहे.
आज दूरदृष्य प्रणालीद्वारे पर्यावरण मंत्री आदित्य ठाकरे यांनी प्रदुषण नियामक मंडळाचे वरिष्ट अधिकारी अशोक शिंगारे, जिल्हाधिकारी अजय गुल्हाने, बंडू धोत्रे यांचेशी चर्चा केली. यावेळी, जिल्हा परिषदेचे मुख्य कार्यकारी अधिकारी राहुल कर्डिले, अपर जिल्हाधिकारी विद्युत वरखेडकर,चंद्रपूर महानगरपालीका आयुक्त राजेश मोहिते, निवासी उपजिल्हाधिकारी मनोहर गव्हाळ, जिल्हा नियोजन अधिकारी गजानन वायाळ, उपजिल्हाधिकारी पल्लवी घाडगे प्रामुख्याने उपस्थित होते.
यावेळी जिल्हाधिकारी अजय गुल्हाने यांनी रामाळा तलावाच्या शुद्धीकरणासाठी स्थानीक प्रशासनाकडून करण्यात येत असलेले प्रयत्न व प्रत्यक्षात येणाऱ्या अडचणींबाबत माहिती दिली. तलावात तीन छोटे व एका मोठ्या नाल्याचे सांडपाणी जमा होत असल्याने व मोठ्या प्रमाणात गाळ जमा झाला असल्याचे त्यांनी सांगितले. यासाठी सर्वप्रथम नाल्याचे पाणी दुसरीकडे वळविणे आवश्यक असल्याचे त्यांनी सांगितले.
मंत्री ठाकरे यांनी ‘माझी वसुंधरा’ व पर्यटनासंदर्भात अधीवेशनानंतर लवकरच चंद्रपूर येथे बैठक घेणार असल्याचे सांगीतले यावेळी चंद्रपूर जिल्ह्यासाठी पर्यटनाच्या दृष्टीने अधिक काय करता येईल त्याबाबत आढावा घेण्यात येईल. पर्यावरनाशी निगडीत संस्था व नागरिकांनी देखील समन्वयातून कामे करण्याचे आवाहन त्यांनी केले.
बैठकीला संबंधीत अधिकारी उपस्थित होते.
