शेतकऱ्यांसाठी प्रधानमंत्री किसान सन्मान निधी योजना सुरु
गडचिरोली,दि.26: शेतक-यांना निश्चित उत्पन्न मिळण्याकरीता केंद्र शासनाने प्रधानमंत्री किसान सन्मान निधी (PM KISAN) योजना सुरु केली आहे. या योजने अंतर्गत सरसकट सर्व पात्र शेतकरी कुटुंबास (पती, पत्नी व त्यांची 18 वर्षाखालील अपत्ये) रु. 2000/- प्रती हप्ता या प्रमाणे तीन समान हप्त्यात प्रती वर्षी रू. 6000/- लाभ अदा करण्यात येत आहे.
दिनांक 27 जुलै, 2023 रोजी सकाळी 11.00 वाजता माननीय प्रधानमंत्री महोदयांच्या शुभहस्ते प्रधानमंत्री किसान सन्मान निधि योजने (PMKISAN) अंतर्गत चौदाव्या हप्त्यातील (एप्रिल, 2023 ते जुलै, 2023) देय्य लाभ देशातील लाभार्थी शेतकऱ्यांच्या बँक खात्यात सीकर, राजस्थान येथून ऑनलाइन समारंभाद्वारे वितरीत होणार आहे. या समारंभास मा. श्री. नरेंद्र सिंह तोमर, केंद्रीय कृषी आणि शेतकरी कल्याण मंत्री, मा. डॉ. मनसुख मांडविया, केंद्रीय रसायने आणि खते आणि आरोग्य आणि कुटुंब कल्याण मंत्री व इतर मान्यवर उपस्थित राहणार आहेत. या समारंभामध्ये कृषि विज्ञान केंद्रावर (KVK) https://pmindiawebcast.nic.in या लिंक चा वापर करून परिसरातील शेतक-यांना सहभागी होता येईल.
चौदाव्या हप्त्याची हस्तांतरित करावयाची रक्कम शेतकऱ्यांना खरीप हंगामात बियाणे, खते, औषधे सारख्या कृषी निविष्ठा खरेदी करण्यासाठी निश्चितच उपयुक्त ठरणार आहे .
माहे फेब्रुवारी, 2019 मध्ये प्रधानमंत्री किसान सन्मान निधी योजना सुरू झाल्यापासून महाराष्ट्र राज्यात या योजने अंतर्गत दिनांक 25 जुलै, 2023 अखेर 110.53 लाख लाभार्थी शेतकऱ्यांना एकूण रु. 23731.81/- कोटी रक्कमेचा लाभ हस्तांतरित झाला आहे.
दि. 27 जुलै, 2023 रोजीच्या समारंभात दिनांक 1 एप्रिल, 2023 ते दिनांक 31 जुलै, 2023 या कालावधीकरिता देय्य चौदाव्या हप्त्यावेळी महाराष्ट्र राज्यातील एकुण 85.66 लाख पात्र लाभार्थी शेतकऱ्यांना साधारण रू. 1866.40/- कोटीचा लाभ थेट त्यांच्या बँक खात्यात हस्तांतरित केला जाणार आहे.
या योजनेचा लाभ आधार संलग्न बँक खात्यात जमा करण्याचा निर्णय केंद्र शासनाने घेतला आहे. राज्यातील 88.92 लाख लाभार्थ्यांचे बँक खाते आधार संलग्न लाभ अदायगीसाठी नोंदणीकृत झाले आहेत. उर्वरीत सर्व लाभार्थी यांनी PM KISAN योजनेचा लाभ जमा होण्यासाठी आपले बँक खाते आधार संलग्न करण्याकरीता संबंधित बँकेत जाऊन आवश्यक अर्ज बँकेत सादर करून आधार संलग्न करण्याची प्रक्रिया पुर्ण करावी, असे आवाहन करण्यात येत आहे.
खरीप, 2023 हंगामात विविध कृषी निविष्ठां खरेदीसाठी चौदाव्या हप्त्याचा हा लाभ शेतकऱ्यांना उपयुक्त ठरून कृषी उत्पादन वाढीला चालना मिळणार आहे. असे कृषि संचालक (विस्तार व प्रशिक्षण) कृषि आयुक्तालय, महाराष्ट्र राज्य, पुणे यांनी कळविले आहे.
