जिल्हा शल्य चिकित्सक यांच्या अध्यक्षतेखाली पी.सी.पी.एन.डी.टी. सल्लागार समितीची सभा संपन्न
गडचिरोली,दि.18: मुलगाच व्हावा म्हणून काही जोडपे गरोदरपणी सोनोग्राफी द्वारे गर्भाची तपासणी करून घेतात स्त्रीलिंगी गर्भ असेल तर निर्भयपणे गर्भपात करून त्या जीवाच्या छळ करतात अशा प्रवृत्तीमुळे समाजात पुरुषांच्या तुलनेत स्त्रियांचे प्रमाण कमी झाले आहे. प्रसुती पूर्व गर्भलिंग तपासणी करणे कायद्याने गुन्हा आहे. व पी.सी.पी. एन.डी.टी. कायद्याअंतर्गत डॉक्टरांना तीन वर्षाच्या करावास व दहा हजार रुपयांच्या दंड शिक्षा होऊ शकते. मुली वाचवा अभियानांतर्गत मुलींच्या जन्मदर वाढविण्यासाठी जिल्ह्यात आरोग्य विभागातर्फे जनजागृती पर भर देणे गरजेचे आहे असे प्रतिपादन जिल्हा शल्य चिकित्सक डॉ. प्रमोद खंडाते यांनी केले. शुक्रवारी जिल्हा सामान्य रुग्णालय पी.सी.पी. एन.डी.टी. सल्लागार समितीची सभा घेण्यात आली यावेळी अध्यक्ष स्थानावरून ते बोलत होते.
सभेला प्रामुख्याने अतिरिक्त जिल्हा शल्य चिकित्सक डॉ. सतीशकुमार सोळंके, विधी सल्लागार ॲड. संजय ठाकरे पीसीएनडीटी सल्लागार ॲङ तृप्ती राऊत, सामाजिक कार्यकर्ते गणेश नेते, स्त्री रोग तज्ञ डॉक्टर श्रद्धा ठाकरे, पी.सी.पी.एन.डी.टी नोडल ऑफिसर डॉक्टर नीलकंठ मसराम, बाल रोग तज्ञ डॉ. प्रशांत पेंदाम, समितीचे सदस्य उपस्थित होते.
जिल्ह्यातील सोनोग्राफी व गर्भपात केंद्रात अवैध गर्भपात होत असल्याचे शंका असल्यास नागरिकांनी ऑनलाईन तक्रार करावे यासाठी संकेतस्थळ www.amchimulgi.gov.in व टोल फ्री क्रमांक 18002334475 निर्गमित करण्यात आले आहे. अवैध गर्भपाताविषयी माहिती देणाऱ्यास खातरजमा करुन रुपये 1 लक्ष (अक्षरी रुपये एक लक्ष रुपये फक्त) बक्षीस देण्यात येईल. अशी माहिती डॉ. श्री. खंडाते यांनी यावेळी दिली. आरोग्य विभागातर्फे जिल्ह्यात बाजार, जत्रा व इतर गर्दीच्या ठिकाणी जनजागृतीपर कार्यक्रम घेण्यात येणार आहे. मुलींचा जन्मदर वाढविण्यासाठी अवैध गर्भपातावर आळा घालण्यासाठी नागरिकांनी सहकार्य करण्याचे आवाहन केले आहे.
विधीतज्ञ ॲङ तृप्ती राऊत यांनी सभेमध्ये जिल्ह्यातील मुलींच्या जन्मदराविषयी माहिती दिली. जिल्ह्यात सोनोग्राफी सेंटरची व गर्भपात सेंटरचे मासिक तपासणी सुरू असून कोणत्याही सोनोग्राफी मध्ये त्रुटी आढळल्यास किंवा गर्भलिंग निदान तपासणी विषयी माहिती आढळल्यास त्यांच्यावर कठोर कारवाई करण्यात येईल असे जिल्हा शल्य चिकित्सक यांनी यावेळी सांगितले. जिल्ह्यामध्ये मुलांपेक्षा मुलींच्या जन्मदर कमी असून तो भरून काढण्यासाठी पी.सी.पी. एन.डी.टी. अंतर्गत कठोर कारवाईचे पाऊल उचलले आहे. असे जिल्हा शल्य चिकित्सक डॉ. प्रमोद खंडाते यांनी कळविले आहे.
