स्पर्धा परीक्षा पूर्व प्रशिक्षण योजनेचा लाभ घेण्याकरिता आदिवासी उमेदवारांनी 25 नोव्हेंबर पर्यंत अर्ज सादर करावे
भंडारा, दि. 17 : स्पर्धा पूर्व परीक्षा उत्तीर्ण होण्यासाठी आदिवासी जमातीमधील उमेदवारांना मार्गदर्शन व प्रशिक्षणाची आवश्यकता असल्याने आदिवासी परिसरात महाराष्ट्र शासनाने स्पर्धा परीक्षा पुर्व प्रशिक्षण ही योजना सुरू केली आहे. माहिती व मार्गदर्शन प्रशिक्षण योजनेचे तिसरे सत्र तीन महिने पंधरा दिवसाचे असून ते 1 डिसेंबर 2022 ते 15 मार्च 2023 या कालावधीत घेण्यात येणार आहे. प्रशिक्षणाकरिता उमेदवारांची शैक्षणिक पात्रता, शाळा सोडल्याचा दाखला, बँकेचे पासबुक, आधार कार्ड व जातीच्या प्रमाणपत्राच्या छायांकित प्रतीसह अर्ज 25 नोव्हेंबर 2022 पर्यंत आदिवासी उमेदवारांकरीता कौशल्य विकास, रोजगार व उद्योजकता माहिती व मार्गदर्शन केंद्र, गुरुद्वारा जवळ, देवरी जि. गोदिया येथे सादर करावा.
प्रशिक्षणासाठी उमेदवार आदिवासी जमाती प्रवर्गातील असावा, उमेदवाराचे वय 18 वर्षे पूर्ण असावे, भंडारा व गोंदिया या जिल्ह्यातील रहिवासी असावा, प्रशिक्षणाचा यापूर्वी त्याने लाभ घेतलेला नसावा, रोजगार व स्वयंरोजगार कार्यालयातील ऑनलाईन नोंदणी कार्ड त्याच्याकडे असावे, उमेदवार एस.एस.सी. उत्तीर्ण असावा, उच्च शैक्षणिक पात्रता धारक व टंकलेखक/ संगणक/ लघुलेखक परीक्षा उत्तीर्ण असणाऱ्या उमेदवारांना प्राधान्य देण्यात येईल, निवड झालेल्या प्रशिक्षणार्थ्यांना दरमहा 1 हजार विद्यावेतन देण्यात यईल, असे आदिवासी उमेदवारांकरीता कौशल्य विकास, रोजगार व उद्योजकता माहिती व मार्गदर्शन केंद्र, देवरी यांनी कळविले आहे.
