सार्वजनिक वाचनालयात मराठी भाषा
गौरवदिन कार्यक्रम थाटात साजरा
· जेष्ठ साहित्यीक प्रल्हाद सोनवाने यांचा हृदय सत्कार
भंडारा दि. 27 : मराठी भाषा विभाग, जिल्हा ग्रंथालय अधिकारी कार्यालयाव्दारे आज आयोजित सार्वजनिक वाचनालयात मराठी भाषा गौरवदिन कार्यक्रम उत्साहात संपन्न झाला. यावेळी कार्यक्रमाचे अध्यक्ष पटेल महाविदयालयाच्या मराठी भाषा विभागाचे माजी प्रमुख सुमंत देशपांडे होते. तर व्यासपीठावर जिल्हा ग्रंथालय संघाचे अध्यक्ष धनंजय दलाल, जिल्हा माहिती अधिकारी शैलजा वाघ-दांदळे, तिडके महाविदयालयाचे मराठी विभागप्रमुख नरेश आंबीलकर उपस्थित होते.
लाखनी येथील गझलकार व जेष्ठ साहित्यीक प्रल्हाद सोनवाने यांचा साहित्यीक क्षेत्रातील योगदानासाठी शाल, श्रीफळ, सन्मानचिन्ह, देवून विशेष सत्कार करण्यात आला. करूणाघना, गीत गौरव, वैनगंगेच्या तीरी या पुस्तकांचे लिखाण केलेल्या प्रल्हाद सोनावणे यांना राष्ट्रसंत तुकडोजी व विनोबा यांचे सानिध्य लाभलेले आहे. त्यांच्या अविरत साहित्य सेवेसाठी त्यांचा सत्कार करण्यात आला. सत्काराला उत्तर देतांना त्यांनी भाषेच्या संवर्धनासाठी सामुहिक जिगीषा आवश्यक असल्याचे मत मांडले.
कार्यक्रमाचे प्रास्ताविक जिल्हा ग्रंथालय अधिकारी खुमेंद्र बोपचे यांनी केले. भाषा गौरव दिनी गौरवासोबतच परखड विश्लेषण करण्याची गरज असल्याचे जिल्हा माहिती अधिकारी शैलजा वाघ-दांदळे यांनी सांगितले. इंग्रजी ही भौतिक प्रेरणेतुन विस्तारलेली भाषा असून त्या भाषेपुढे सांस्कृतिक प्रेरणा असणारी मराठी भाषा जपणे महत्वाचे असल्याचे त्यांनी सांगितले.
बोलीभाषेचे वैविध्य जपत प्रमाणभाषेत सकस साहित्याची निर्मिती मराठी साहित्यात झाली पाहिजे. मराठी ही ज्ञानभाषा होण्याच्या दृष्ट्रीने प्रयत्न करण्याची गरज असल्याचे मत अध्यक्ष सुमंत देशपांडे यांनी मांडले. तर जी भाषा बोलल्याने प्रेम, प्रतिष्ठा व पैसा मिळतो ती भाषा समृध्द होत टिकून राहत असल्याचे मत नरेश आबिंलकर यांनी व्यक्त केले. कार्यक्रमाचे सुत्रसंचालन वाचनालयाचे कार्यवाह डॉ.जयंत आठवले यांनी तर आभार राजकुमार हटवार यांनी केले. कार्यक्रमाला ग्रंथालय संघाचे सदस्य, विदयार्थी, अभ्यासक, प्राध्यापक मोठया प्रमाणावर उपस्थित होते.
लाल बहादूर शाळेची इयत्ता नववीची विदयार्थीनी नंदिनी लेखचंद रूषेसरी हिने अखील भारतीय मराठी साहित्य संमेलनात कविता वाचनात सहभाग घेतला. त्यासाठी प्रशस्तीपत्र देवून गौरव करण्यात आला. नुतन कन्या शाळेची विदयार्थीनी रेणुका पातुरकर अभिवाचन स्पर्धेत प्रथम क्रमांक पटकावल्याबददल प्रशस्तीपत्र देवून सत्कार करण्यात आला. लाल बहादूर शास्त्री विदयालयाची विदयार्थीनी अनुष्का आंबीलकर हिचा कथालेखन जिल्हास्तरीय प्रथम पुरस्काराबद्दल गौरव करण्यात आला.
